Berisha kërkoi përjashtimin e gjyqtares nga çështja, shtyhet seanca në GJKKO

Është shtyrë seanca gjyqësore për Sali Berishën, pasi avokatët mbrojtës kërkuan kohë që të njihen me aktet. Seanca do të zhvillohet të mërkurën ora 14:30

Ish-kryeministri akuzohet nga GJKKO për korrupsion pasiv, pasi përmes akteve ligjore ka favorizuar dhëndrin për privatizimin e ish-kompleksit sportiv “Partizani”.

Ndaj ish-kryeministrit Berisha janë vendosur masat e sigurisë “detyrim paraqitjeje” dhe “ndalim i daljes jashtë shtetit” për akuzën “korrupsion pasiv”.

Kujtojmë se më herët gjatë ditës së sotme, avokati i Sali Berishës, Genc Gjokutaj, tha në një deklaratë për mediat se kanë kërkuar përjashtimin e gjyqtares Irena Gjoka.

Ai u shpreh se kjo kërkesë është depozituar.

“Kemi depozituar një kallëzim në SPAK për veprën penale të shpërdorimit të detyrës dhe kemi kërkuar përjashtimin e saj nga shqyrtimi i çështjes. Gjykimi është ndërprerë për t’u shqyrtuar kjo kërkesë sepse ju e dini se pas kërkesës për përjashtim gjyqtarët nuk mund të vazhdojnë më seancën e gjykimit dhe po presim për vendimin e shqyrtimit të kërkesës për përjashtim të saj. Ne nuk vijmë këtu që të na jepen 2-3 orë e të lexojmë 20 mijë faqe. Ne jemi për një proces të rregullt, për një mbrojtje efektive, kështu që ne do të presim njëherë vendimin e gjykatës dhe pastaj edhe procesin me njohjen, por do të jemi në kontakt,” – u shpreh Gjokutaj.

Një ditë më parë GJKKO vendosi të lërë në burg Jamarbër Malltezin, dhëndrin e Sali Berishës, si edhe detyrim paraqitjeje për ndërtuesin Fatmir Bektashi.

LEXONI GJITHASHTU:

• “Shteti neutralizonte kërcënuesit” Gjokutaj flet për eksperiencën si prokuror
• 12 britanikë të vrarë, ndërsa të paktën 5 janë zhdukur nga sulmet e Hamasit