Dosja “Partizani”, caktohet data e seancës së parë në themel ndaj Sali Berishës

Gjykata e Posaçme caktoi datën 30 qershor, ora 10.00 për të zhvilluar seancën e parë në themel për dosjen e privatizimit të ish-klubit sportiv “Partizani”.

Në këtë dosje të pandehur janë marrë pesë persona: ish-kryeministri Sali Berisha, dhëndri i tij Jamarbër Malltezi, biznesmeni Fatmir Bektashi, Andia Pustina dhe Xhimi Begeja.

Rreth një muaj më parë GJKKO pranoi kërkesën e SPAK për të kaluar dosjen “Partizani” për gjykim.

Dosja për privatizimin e ish-klubit sportiv Partizani ka qëndruar për 7 muaj në seancë paraprake.

Sali Berisha është marrë i pandehur për korrupsion pasiv pasi akuzohet se ka ndërmarrë veprime konkrete në miratim ligjesh dhe aktesh nënligjore, për t’i përshtatur sipas nevojave të pesë familjeve pronare në kompleksin sportiv Partizani, ku përfitues ishte edhe dhëndri i tij, Jamarbër Malltezi.

Jamarbër Malltezi akuzohet për korrupsion pasiv, kryer në bashkëpunim me Sali Berishën pasi në marrëveshje me këtë të fundit, duke shfrytëzuar pushtetin, privatizuan kompleksin partizani që i solli familjes miliona euro përfitime. Malltezi akuzohet dhe për pastrim parash.

LEXONI GJITHASHTU:

• Zgjatja e hetimeve për Metën, Berisha: Shkelje e ligjeve, do përgjigjen për këtë akt
• Berisha nderon me një minutë heshtje Bujar Bukoshin: Dha kontribut për Kosovën