Dosja “Partizani”, Malltezi kërkon në gjyq transmetimin live të seancave

Është mbajtur këtë të hënë në GJKKO seanca gjyqësore për dosjen “Partizani”. Nga të pandehurit, i pranishëm në sallë ishte vetëm Jamarber Malltezi, i dyshuar nga SPAK për veprat penale “korrupsion pasiv” dhe “pastrim parash”, ndërsa të pandehurit e tjerë përfaqësohen nga avokatët.

Avokati i ish-kryeministrit Sali Berisha, Genc Gjokutaj, kërkoi pavlefshmëri absolute për marrjen si të pandehur dhe njoftimin e akuzës për Berishën. Gjokutaj argumentoi se nga të dhënat e njoftimit të SPAK rezulton se Berisha, në cilësinë e tij si kryeministër, ka kryer veprime konkrete duke miratuar akte ligjore dhe nënligjore me qëllim përfitimin e familjeve pronare, ku përfitues ishte edhe Jamarber Malltezi. Ai shtoi se Prokuroria ka tejkaluar kompetencat e saj kushtetuese dhe ngritja e akuzës nuk është kryer në përputhje me ligjin.

Avokatët e Berishës argumentuan gjithashtu se hetimet e SPAK ndaj ish-kryeministrit janë kryer me urdhër politik nga Edi Rama dhe se edhe ish-ambasadorja amerikane Yuri Kim ka ushtruar presion për hetimet ndaj Berishës.

Edhe Jamarbër Malltezi dhe avokati i tij, Klodian Skënderi, kërkuan pavlefshmëri absolute të akteve të Prokurorisë për njoftimin e akuzës dhe vendimeve të marra nga gjyqtarja Irena Gjoka. Avokati i Xhimi Begës kërkoi pavlefshmërinë e të gjitha akteve, ndërsa avokati i Fatmir Bektashit rezervoi të drejtën për të bërë kërkesa në seancën e radhës.

Prokurori i SPAK, Arben Kraja, deklaroi se do të dëgjojë të gjithë dhe më pas do të mbajë qëndrimin e tij.

Seanca u ndërpre dhe seanca e radhës është caktuar për datën 29, ora 11:00.

Gjithashtu, Jamarbër Malltezi kërkoi që gjyqi për dosjen “Partizani” të transmetohet live dhe kërkoi nga trupi gjykues lejen për praninë e mediave me pajisjet e nevojshme.

LEXONI GJITHASHTU:

• Berisha paraqitet në SPAK: Vlerësoj qëndrimin e DASH për mandatin e Dumanit
• Dosja ‘Partizani’/ Berisha kërkon pavlefshmëri, Malltezi i vetmi i pranishëm