Shtyhet sërish seanca paraprake në GJKKO për kreun e PD-së Sali Berishën. Nga seanca e ditës së sotme, pritej që vendimi të kalonte ose jo për gjykim.
Mësohet se seanca e radhës për dosjen “Partizani” shtyhet më datë 11 prill 2025, rreth orës 10:00
Në një deklaratë për media, avokati i Berishës, Genc Gjokutaj tha se arsyeja e shtyrjes së seancës është mungesa e një prej avokatëve për arsye shëndetësore. Ai u shpreh se gjatë seancës u dhanë kontestimet e Prokurorisë ndaj qëndrimit të avokatëve. Gjokutaj shton se ka mungesë të një fakti penal duke kërkuar një pushim të çështjes.
Sali Berisha është marrë i pandehur për korrupsion pasiv pasi akuzohet se ka ndërmarrë veprime konkrete në miratim ligjesh dhe aktesh nënligjore, për t’i përshtatur sipas nevojave të pesë familjeve pronare në kompleksin sportiv Partizani, ku përfitues ishte edhe dhëndri i tij, Jamarbër Malltezi.
Jamarbër Malltezi akuzohet për korrupsioni pasiv, kryer në bashkëpunim me Sali Berishën pasi në marrëveshje me këtë të fundit, duke shfrytëzuar pushtetin, privatizuan kompleksin partizani që i solli familjes miliona euro përfitime. Malltezi akuzohet dhe për pastrim parash.