Dosja Veliaj, vijon sot seanca paraprake për kryebashkiakun në GJKKO

Në Gjykatën e Posaçme zhvillohet këtë të premte seanca e radhës për dosjen “Veliaj”, ku të pandehur janë kryebashkiaku i Tiranës, Ajola Xoxa bashkëshortja e tij, si edhe 28 persona e subjekte të tjera. Në këtë seancë pritet të paraqitet vijimi i mbrojtjes nga vetë Veliaj, nga bashkëshortja e tij si edhe nga dy biznesmenët e akuzuar, Gentjan Sula dhe Shkëlqim Fusha, si dhe shoqëritë që ata përfaqësojnë.

Gjatë seancave të kaluara, Veliaj ka deklaruar se nuk është njohur plotësisht me aktet, pasi nuk i është vënë në dispozicion dosja fizike, por vetëm një USB që nuk ka mundur ta hapë, pasi në qeli nuk disponon laptop. Ai ka kërkuar gjithashtu të mos mbahet në kafazin e xhamit gjatë seancave, por pranë avokatit, por kjo kërkesë është rrëzuar nga GJKKO.

Në seancën e 5 dhjetorit përfunduan paraqitjet e mbrojtjes nga ish-deputetja socialiste Klotilda Bushka, si edhe nga avokatët e shoqërive “Byla” dhe “Eventus”.

Veliaj ndodhet në paraburgim prej muajit shkurt dhe përballet me akuza për pastrim parash, mosdeklarim pasurie, korrupsion pasiv në nëntë episode, shpërdorim detyre dhe futje të sendeve të ndaluara në qeli. Kryebashkiaku, që vazhdon të mbajë detyrën me vendim të Gjykatës Kushtetuese, ka mohuar akuzat duke i konsideruar ato të pabazuara në prova.

LEXONI GJITHASHTU:

• SPAK reagon për pretendimet e kryebashkiakut të Tiranës:Veliaj është njohur me aktet
• Fjala e plotë e Veliajt para GJKKO: Më është mohuar e drejta për tu njohur me aktet