Dosja “Xibraka”/ SPAK mbyll hetimet: S’ka prova për Olsi Ramën

SPAK ka mbyllur hetimet lidhur me dosjen “Xibraka” ku në përfundim të hetimeve është shprehur se nuk ka prova apo fakte për përfshirjen e vëllait të kryeministrit Edi Rama, Olsi Ramën, në aktivitetin kriminal.

Kujtojmë se ka qenë deputeti demokrat Gazment Bardhi ai që ka denoncuar më herët në SPAK për përfshirjen e Olsi Ramës në këtë çështje. Pas pretendimeve të deputetit për përfshirjen e vëllait të kryeministrit në aktivitete të paligjshme, SPAK ka rinisur hetimet e pezulluara që në 2016.

Sipas njoftimit të SPAK pasi janë kryer një sërë veprimesh hetimore, përfshirë bashkëpunimin me autoritetet kompetente të Kosovë, ka rezultuar se nuk ekzistojnë prova apo fakte që të lidhin Ols Ramën me aktivitetin kriminal, për të cilin janë dënuar më parë disa individë. Gjithashtu sipas njoftimit të SPAK nuk janë identifikuar autorë të tjerë të mundshëm për veprat penale në fjalë.

Njoftimi i SPAK:

Prokuroria e Posaçme kundër Korrupsionit dhe Krimit të Organizuar ka përfunduar hetimet për procedimin penal nr. 88 të vitit 2024, të regjistruar pas rifillimit të hetimeve të pezulluara të procedimit penal nr. 335/1 të vitit 2016. Ky procedim lidhej me veprat penale të “Prodhimit dhe shitjes së narkotikëve”, “Trafikimit të narkotikëve”, dhe “Kryerjes së veprave penale nga grupet e strukturuara kriminale”, të parashikuara në nenet përkatëse të Kodit Penal.

Hetimet rifilluan pas administrimit të një informacioni të dërguar nga deputeti Gazment Bardhi, i cili pretendoi përfshirjen e shtetasit, Ols Rama në veprimtari të paligjshme. Në kuadër të këtyre hetimeve, SPAK ka kryer një sërë veprimesh hetimore, përfshirë bashkëpunimin me autoritetet kompetente të Kosovës.

Nga hetimet ka rezultuar se nuk ekzistojnë prova apo fakte që të lidhin shtetasin Ols Rama me aktivitetin kriminal, për të cilin janë dënuar më parë disa individë. Gjithashtu, nuk janë identifikuar autorë të tjerë të mundshëm për veprat penale në fjalë.

Në përputhje me nenin 326 të Kodit të Procedurës Penale, më datë 23 dhjetor 2024, është vendosur pezullimi i hetimeve për procedimin penal nr. 88 të vitit 2024, pasi autorët e tjerë të veprave penale nuk janë identifikuar. Dosja i është dërguar Drejtorisë së Përgjithshme të Policisë së Shtetit për të vijuar përpjekjet për identifikimin e autorëve.

LEXONI GJITHASHTU:

• “O do gjykohet im vëlla, o ti” Rama i përgjigjet Bardhit për interpelancën në Kuvend
• Olsi Rama pas daljes nga Prokuroria e Posaçme: Dhashë shpjegime për çështjen Xibraka
• Rama i refuzoi interpelancën, Bardhi: Presion SPAK që të mbyllë dosjen e të vëllait