“Duam shërbim dinjitoz”, qytetarët protestojnë për kushtet në Spitalin e Lushnjës

Dhjetëra banorë të Lushnjës kanë zhvilluar paraditen e kësaj të diele një protestë, duke kundërshtuar kushtet që, sipas tyre, janë jashtë standardeve në Spitalin e Lushnjës. Tubimi është iniciuar nga deputeti i Partisë Demokratike, Saimir Korreshi.

“Qytetarët e Lushnjës sot po protestojnë për një të drejtë bazike, për shërbim shëndetësor dinjitoz. Spitali i Lushnjës nuk mund të vazhdojë të funksionojë me këto kushte që nuk i përgjigjen nevojave të qytetarëve që janë taksapagues dhe meritojnë shërbim cilësor”, u shprehën pjesëmarrësit gjatë protestës.

Gjatë tubimit, protestuesit shprehën indinjatën e tyre për mungesën e kushteve dhe problematikat me të cilat përballet spitali, duke kërkuar ndërhyrje urgjente për përmirësimin e shërbimeve.

“Ky është një shërbim jetik që duhet të ofrohet në çdo kohë dhe me standarde dinjitoze, pasi bëhet fjalë për shëndetin e qytetarëve”, u shprehën disa nga protestuesit.

Pas protestës në ambientet pranë spitalit, qytetarët u nisën në këmbë drejt Bashkisë së Lushnjës, ku vijuan tubimin në sheshin qendror të qytetit. Protesta u përmbyll me thirrje për investime dhe për përmirësimin e kushteve në sistemin shëndetësor lokal.

Ndërkohë, në një reagim në rrjetet sociale, deputeti Saimir Korreshi shkruan se qytetarët e Lushnjës ngritën zërin për kërkesën e tyre për një spital rajonal me kushte dinjitoze.

“Sot Lushnja foli, qytetarët kërkuan një Spital Rajonal me kushte dhe standarde dinjitoze për të gjithë ne”, shkruan Korreshi.