“Këto janë përgatitjet e fundit të kombëtares shqiptare në prag të ndeshjes së dytë kualifikuese drejt Kupës së Botës. Kuqezinjtë përballen mbrëmjen e së hënës me Andorrën në kryeqytet”.
Gjithçka është gati, ndërsa kombëtarja shqiptare përballet me Andorrën në duelin e radhës kualifikues drejt Kupës së Botës. Grupi ka qenë i plotë në seancën stërvitore, teksa pritet që mbrojtësi Ismajli të mos aktivizohet për shkak të disa shqetësimeve.
Në konferencën për shtyp, trajneri Sylvinho analizoi kundërshtarin.
“Kemi një rrugë ku nuk duhet e nuk mund të gabojmë, një ndeshje shumë e vështirë. I kam parë ndaj Letonisë, një goditje standarte ndërroi ndeshjen. Ne duhet të gjejmë hapësira që nuk janë, nuk është e thjeshtë, të gjejmë hapësirë për të luajtur, shënuar, të gjejmë sa më shumë. Kemi një stërvitje taktike për të gjetur këtë hapësirë”.
Më tej tekniku u ndal te futbollistët kuqezi.
“Kam mundësinë që nga 26 lojtarë që grumbullohen në total të zgjedh 23 dhe më pas të hedh në fushë 11 prej tyre dhe në përgjithësi vë lojtarët që janë më të mirë për të ndihmuar ekipin. Unë do të isha i pari që do i thosha faleminderit një lojtari që nuk është i gatshëm për ekipin iu kam thënë dhe në seancën e fundit me video që nëse duam që të arrijmë diçka, për të shkuar në Botëror duhet të sakrifikojmë shumë”, Sylvio Campos Junior, Trajner i Shqipërisë.
I pranishëm në konferencë ishte dhe kapiteni Gjimshiti i cili nuk i harroi tifozët kuqezi.
“Ka qenë një pyetje për biletat, besoj do merren masat dhe do e kalojmë edhe këtë vështirësi. Jemi falenderues për mbështetjen, janë tifozët më të bukur në botë. Nuk ka tifozë kaq të zhurmshëm nëpër kombëtare. Shpresojmë të na përkrahin”,- Berat Gjimshiti, Futbollist i Shqipërisë.
Shqipëria dhe Andorra përballen me njëra-tjetrën të hënën në 20:45 në Arenën Kombëtare, ndërsa policia ka ndërmarrë disa masa mes tyre dhe bllokimin e disa akseve rrugore, duke nisur nga ora 15 deri në përfundim të ndeshjes.
LEXONI GJITHASHTU:
- Shqipëria gati për miqësoren, Sylvinjo e Gjasula: Mund ta përballojmë Euro 2024
- Shqipëri – Andorra/ Dalin në shitje biletat fizike pranë stadiumit “Arena Kombëtare”
