Shqipëria gati për miqësoren, Sylvinjo e Gjasula: Mund ta përballojmë Euro 2024

Mbrëmjen e së hënës kombëtarja shqiptare përballet me Lihtenshtejnin në miqësoren e parë të muajit qershor, ku 4 ditë pas saj përballet me Azerbajxhanin. Kuqezinjtë vijojnë stërvitjen në Austri, ku grupi është i plotë, në mungesë të kapitenit Gjimshiti, për shkak të angazhimeve me Atalantën

Të dielën është zhvilluar konferenca për mediat me prani të trajnerit Sylvinjo dhe mesfushorit Gjasula, ku kanë analizuar atmosferën si dhe garën që na pret në Euro 2024.

“Këtu në qendrën stërvitore është një atmosferë shumë e mirë. Donim që grumbullimin ta nisnim në Tiranë për të ndjerë atmosferën dhe emocionin që kanë njerëzit. E kemi ndjerë publikun shumë afër nesh. Kemi ardhur në Austir për të punuar dhe të përgatitemi sa më mirë për Europianin”, deklaroi Sylvinjo.

Më tej braziliani shtoi se lojtarët mund ta përballojnë këtë ngarkesë fiziko-psikologjike.

“Sa i përket formës fizike mendoj që lojtarët janë në gjendje të mirë dhe mund ta përballojnë Europianin. Duhet të përgatisim lojtarët sa më mirë që të japin kontributin e tyre për ekipin. E rëndësishme është që në momentin që aktivizohen të japin maksimumin në fushën e lojës”, tha trajneri i kombëtares.

Ndeshjen ndaj Lihtenshtejn, Gjasula e cilëson si test ku lojtarët do të njohin më mirë njëri-tjetrin në fushë.

“Kemi disa muaj që nuk kemi luajtur bashkë, ndeshja nesër do na ndihmojë të gjejmë njëri-tjetrin. Ndoshta nuk është kombëtare shumë e fortë por do provojmë të nxjerrim atë se çfarë kemi bërë në stërvitje, ky është objektivi”, tha Gjasula.

Shqipëria dhe Lihtenshtejni janë përballur 3 herë me njëra-tjetrën, ku ndeshjet janë fituar nga kuqezinjtë.

LEXONI GJITHASHTU:

• Silvinjo e la jshtë Euro2024, reagon ashpër menaxheri i Uzunit: Nuk e meriton këtë
• Silvinjo prezanton listën e Shqipërisë në Euro 2024, mungesat dhe prurjet e reja