Durrës/ Kapet me 1000 fishekë dhe 20 mijë euro, arrestohet 55-vjeçari

Një shtetas 55-vjeçar është arrestuar nga Policia Kufitare në Portin e Durrësit, pasi u kap në tentativë për të futur në territorin shqiptar municion dhe një shumë të konsiderueshme parash, pa i deklaruar pranë autoriteteve doganore.

Sipas njoftimit zyrtar, gjatë kontrolleve të shtuara në hyrje-dalje të portit, si pjesë e masave për goditjen e krimeve kufitare, shërbimet policore ndaluan një kamion të drejtuar nga shtetasi Kujtim Aliaj, banues në Tiranë.

Gjatë kontrollit në kabinën e mjetit, u gjetën dhe sekuestruan 1000 fishekë gjahu, një armë gjahu, si dhe rreth 20 mijë euro të padeklaruara. Bashkë me to, Policia sekuestroi gjithashtu kamionin, pasaportën dhe celularin e shtetasit të arrestuar.

Aliaj akuzohet për veprat penale “Trafikimi i armëve dhe i municionit” dhe “Mosdeklarimi në kufi i të hollave dhe i sendeve me vlerë”.

Materialet hetimore i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Durrës, për vijimin e procedurave të mëtejshme ligjore.

• Një 57-vjeçare kineze në Durrës gjendet e pajetë në një taksi
• Eksploziv pranë një hoteli në Durrës, policia kryen shpërthim të kontrolluar