Durrësi “magnet” për italianët, avokatja me 24 vite karrierë zhvendoset në Shqipëri

“Të komunikosh me shqiptarët është shumë e thjeshtë, krahasuar me popujt e tjerë. Sipas meje, mjafton të plotësosh tre kushte: të thuash të vërtetën, të jesh korrekt dhe mos i shtrembërosh fjalët”.

Me këtë bindje në mendje, të ardhur fillimisht si turistë në Durrës, të huajt po kthehen në sipërmarrës.

I tillë është edhe rasti i Consuelo Ferroci-t nga Italia, një avokate me mbi 20 vite karrierë, që së fundmi ka hapur një studio ligjore në qytetin bregdetar.

“Jam avokate prej 24 vjetësh. Merrem vetëm me të drejtat e emigrantëve. Kam punuar me të gjitha shtetësitë në fillim, por prej 10-12 vitesh, pra gjysmën e karrierës sime aktuale, vendosa të punoj vetëm për shqiptarët”, thotë italiania.

Ballafaqimi me realitetin shqiptar nuk ka qenë surprizë për Ferroci-n, që liston 2 arsye përse ndërmori vendimin për t’u zhvendosur përfundimisht në qytetin e dytë më të madh në Shqipëri.

“Erdha këtu për dy arsye: E para sepse kam një studio me shumë avokatë, të cilët përderisa punojnë duhet të paguhen. E dyta pasi vetëm shqiptarët janë mirënjohës. Jo vetëm në aspektin ekonomik, por edhe në  nivelin njerëzor, duke respektuar punën që bëj. Nuk ka qenë një surprizë mikpritja shqiptare, korrektësia e shqiptarëve edhe në aspektin e punës. Kisha bindjen që kështu do të ishte, konfirmova atë që prej kohësh e mendoja”, shprehet ajo.

Sipas Ferroci-t, italianët duhet të mësojnë nga shqiptarët në këtë drejtim.

“Unë jam italiane, por për mua italianët duhet të mësojnë shumë nga respekti për punën dhe korrektësia e shqiptarëve. Këtë besoj se mund të na e mësoni, sepse janë vlera që ne i kemi harruar”,  thotë avokatja italiane.

Në Durrës, 3% e sipërmarrësve janë të huaj, kryesisht italianë që zhvillojnë aktivitet privat në fusha të ndryshme.

LEXONI GJITHASHTU:

• Vrasja e Liridonës, Naim Murseli ndryshon dëshminë! Çfarë thotë avokatja e tij
• 3 mln lekë për 2 të aksidentuarit nga skela në Tiranë? Avokatja tregon shembullin