Dvorani kërkesë zëvendëskryetares së KED-së të vijojë punën për emërimet në Gjykatën Kushtetuese

Ardian Dvorani i ka kërkuar zëvendëskryetares së Këshillit të Emërimeve në Drejtësi (KED) që të tejkalojë “pengesat dhe vonesat e veprimtarisë së Këshillit” duke zhvilluar sa më shpejt mbledhje për shqyrtimin së paku të kandidaturave për vakancën e Besnik Muçit në Gjykatën Kushtetuese (GjK).

Përmes një letre drejtuar zëvendëskryetares Vitore Tusha dhe anëtarëve të tjerë të KED-së, Dvorani, i cili më 11 qershor u shkarkua nga Këshilli i Lartë Gjyqësor (KLGJ), thotë se është humbur shumë kohë dhe KED-ja duhet të njoftojë kandidatët rreth verifikimeve të kryera për to dhe të mbajë sa më parë mbledhje për shqyrtimin e tyre.

Muçi u emërua në tetor 2019 nga Meta, por mandati i tij në GjK u përfundua përpara kohe për shkak të vetingut dhe kështu posti i tij u shpall vakant një muaj më vonë, bashkë me postet e tre anëtarëve të tjerë.

Mirëpo për shkak të përplasjeve mes Presidentit dhe kreut të KED-së, Dvorani, prej periudhës së pandemisë si dhe shkarkimit së fundmi të Dvoranit, procedurat janë zvarritur.

Në letrën e tij, Dvorani e quan antikushtetues shkarkimin nga KLGJ, ndërsa vë në dukje faktin se prej 10 ditësh KLGJ-ja nuk e ka zbardhur vendimin dhe nuk i ka komunikuar atij arsyetimin e plotë.

Shkarkimi i Dvoranit nga kreu i KED-së, u bë pas kërkesës së Presidentit Meta, i cili argumentonte se atij i kishte mbaruar mandati. Procedurat e shkarkimit zgjatën 2 muaj ndërsa aktualisht vendimi nuk është zbardhur, çka praktikisht e ka bllokuar punën dhe ecurinë e emërimeve në GjK.

Mirëpo Dvorani këshillon që zëvendëskryetarja Tusha të marrë në dorë situatën dhe të vijojë më tej punën.

“Do të kërkoja nga zëvendëskryetarja, si edhe nga anëtarët e tjerë të Këshillit të vlerësojnë menjëherë të gjitha rrethanat, të marrin nismat përkatëse dhe të kryejnë veprimet e nevojshme paraprake për njoftimin e kandidatëve lidhur me relacionet e përgatitura për gjetjet në procedurat e verifikimit të kandidaturave të tyre, si edhe për të përcaktuar menjëherë thirrjen e mbledhjes së KED me rend dite shqyrtimin e gjetjeve në procedurat e verifikimit të kandidaturave për një vend vakant, vakancë e parakohshme,” – thotë në letrën e tij Dvorani, i cili e ka kundërshtuar vendimin e KLGJ-së për shkarkimin e tij.

GJK duhet të ketë 9 anëtarë. Minimalisht kuorumi për të marrë vendime është me së paku 6 anëtarë, mirëpo pas procesit të vetingut dhe përplasjeve për emërimet, ajo ka aktualisht vetëm 4 anëtarë: Vitore Tusha, Elsa Toska, Fiona Papajorgji dhe Marsida Xhaferllari.

Lexoni gjithashtu:

Meta thotë se Komisioni i Venecias i dha të drejtë për emërimet në Gjykatën Kushtetuese

Raporti i Avokatit të Popullit evidenton shkeljet e KED

KLGJ e shkarkoi nga Gjykata e Lartë, Ardian Dvorani reagon për Euronews Albania