“E kemi ulur çmimin e gjelit të detit”, fermerët në Vlorë: Shitjet janë të pakta

Në lagjen 11 janari në qytetin fermerët dhe tregtarët kanë ngritur stendat e shitjes ku tregtojnë kryesisht produkte për festat e fundvitit, ku dominon gjeli i detit.

Në prag të festave të fundvitit, në tregun e shpendëve në Vlorë ka nisur shitja e gjelit të detit. Tregtarët thonë se çmimin e kanë ulur, por sërish shitjet janë të pakta.

Ata tregojnë se këtë vit, çmimi për kilogram nuk i kalon 800 lekë, por shqetësim mbeten produktet e importit, të cilat për shkak të çmimit të ulët konkurojnë fermerët e qarkut të Vlorës.

Po ashtu, nisur edhe nga situata e vështirë ekonomike e familjeve vlonjate, shitjet kanë qenë të pakta.

“Të marrësh mendimin tim, ka vajtur aty ku i takon, sepse kaq e ka pasur tregun dhe kaq duhet ta ketë. Me 6-7 është me 8, skalonte kurrë, ndërsa kur vjen me 15-16 është superfuqi që s’e merr dot çdo njeri. Ka shkuar kur s’ka pasur shumë në vend, kurse vjet e sivjet, si duket, kanë sjellë shumë nga jashtë; një pjesë i blejnë të vegjël dhe i rrisin vetë, kurse një pjesë i marrin, i rrisin me mënyrat e tyre andej dhe i kanë interesin t’i shesin lirë, ndërsa unë, që i nxjerr vetë, nuk më leverdis t’i jap këtu kaq”, thotë një fermer.

“Kështu e kemi menduar, të blejmë ndonjë, do e hamë para kohe, çmimet deri tani të kripura janë, me pensionet që marrim ne gjithmonë nuk i përballojmë dot”, thotë një qytetar.

“Dobët, me 7 lekë po e japim, 7 kaposhe me 8 pula, ku i di çfarë do të bëhet, me gjithë këto makina që janë. Unë i rris vetë”, thotë një fermer tjetër.

“Po për të blerë kam ardhur, si çmim është mirë tani, kaposhi me 8; andej nga fshatrat i mbajnë me 10-12, kurse këtu normal. Ne për Vitin e Ri e duam, dy pleq jemi, s’ka kush do t’i mbajë, cilësia kur ta hamë tani, atëherë do duket”, thotë një tjetër qytetar.

Ndonëse këtë vit ka ulje të çmimeve për gjelin e detit qytetarët sërish hasin vështirësi në blerjen e tij. Nga vëzhgimet rezulton se këtë vit në tregun e shpendëve në Vlorë ka ulje çmimesh për të plotësuar kërkesat e konsumatorëve.

Por duke marrë parasysh që ende nuk jami futur në 10 ditëshin e fundit të vitit, blerësit i tremben faktit se kërkesa do rritet e për pasojë edhe çmimi.

LEXONI GJITHASHTU:

• Panairi i gjelit të detit në Peqin, fermerët: Çmimi se justifikon mundin
• Studimi: Pse fëmijët duhet të mësohen të menaxhojnë paratë që në vegjëli