Egnatia nuk ka zhgënjyer në finalen e kupës ku ka mposhtur Kukësin e ngritur lart trofeun. Në Air Albania, u përballën dy skuadrat që për nga renditja në kampionat që sapo u mbyll, luajnë vendi i parë me vendin e fundit. Përballja nisi më mirë për të besuarit e Edlir Tetovës, të cilët ishin më kërkues, ndërsa herë herë reagonte dhe Kukësi.

Goli i vetëm i ndeshjes erdhi në minutën e 38′ aty ku Ndreca realizoi me të djathtën nga brenda zone. Në fraksionin e dytë panorama ishte e njëjtë, veçse verilindorët provuan të jenë më ofensivë. Një prekje e topit brenda në zonë bëri që Egnatia të fitonte 1 penallti, por Fernando e shpërdorori atë, pasi gjuajtja e tij u prit nga Tafas.

Në minutat në vijim Kukësi u hodh i gjithi në sulm duke iu afruar shumë golit të barazimit, por nuk ia doli. Egnatia fiton kështu trofeun e dytë të kupës në histori, ndërsa kujtojmë se diçka të tillë ia doli ta bëjë edhe vitin e shkuar. Tanimë rrogozhinasit do të provojnë të fitojnë edhe titullin kampion, ku në “final 4” përballen me Vllazninë në fazën gjysmëfinale.

LEXONI GJITHASHTU:

• Interi shpallet kampion i Italisë, gdhend yllin e dytë në fanellë
• Pas 7-vitesh në Paris, Mbappe konfirmon largimin nga PSG