Ekskluzive| Sulmi rus ndaj avionit të Von der Leyen, KE reagon për Euronews Albania

Ariana Podesta, zëvendësshefja e zëdhënësve të Komisionit Europian, ka reaguar për Euronews Albania në lidhje me sulmin që u krye ndaj avionit të Presidentes së Komisionit Europian, Ursula von der Leyen, ditën e diel në Bullgari.

Për gazetaren e Euronews Albania, Alice Taylor, Podesta konfirmoi se ka pasur ndërhyrje në sistemin GPS gjatë fluturimit, por shtoi se avioni i Von der Leyen u ul në mënyrë të sigurt.

Sipas saj autoritetet bullgare dyshojnë se kjo ndërhyrje është kryer nga Rusia.

Podesta theksoi se kërcënimet dhe intimidimi janë një element i zakonshëm i veprimeve armiqësore të Rusisë dhe se ky incident forcon vendosmërinë e Bashkimit Evropian për të rritur kapacitetet e mbrojtjes dhe për të mbështetur Ukrainën.

“Kemi marrë informacion nga autoritetet bullgare se ata dyshojnë se kjo ndërhyrje e dukshme është kryer nga Rusia.

Jemi të vetëdijshëm që kërcënimet dhe intimidimi janë një komponent i rregullt i veprimeve armiqësore të Rusisë.

Ky incident do të forcojë edhe më tej angazhimin tonë të palëkundur për të rritur kapacitetet tona të mbrojtjes dhe mbështetjen për Ukrainën.

Ngjarja nënvizon urgjencën e vizitës aktuale të Presidentes në Shtetet Anëtare të vijës së frontit, ku ajo ka parë nga afër kërcënimet e përditshme nga Rusia dhe përfaqësuesit e saj.

Bashkimi Evropian do të vazhdojë të investojë në mbrojtje dhe në gatishmërinë e Europës. Me respekt, Arianna”- thuhet në përgjigjen e dhënë nga Podesta për Euronews Albania.

Kujtojmë se avioni me të cilin udhtonte Presidentja e Komisionit Europian, Ursula von der Leyen, nga Varshava drejt Plovdivit në Bullgari, u detyrua të realizonte “ulje manuale” pasi sistemet ndihmëse satelitore për navigim nuk funksionuan.

Pilotët u detyruan të përdorin vetëm hartat e printuara në avion, pa asistencën e sistemit GPS.

Një zyrtar i aeroportit deklaroi se “GPS-i i të gjithë zonës së aeroportit u fik”.

“Pasi fluturoi përreth një orë, piloti mori vendimin për ta ulur aeroplanin manualisht duke përdorur harta analoge.”- deklaroi punonjësi.

LEXONI GJITHASHTU:

• Çfarë dihet nga sulmi rus ndaj avionit të Von der Leyen, si u fikën sistemet e GPS
• Besonin se brenda ishte Ursula von der Leyen, protestuesit bullgarë godasin makinën