Ekspertët paralajmërojnë: Sëmundjet e veshkave po shndërrohen në epidemi globale

Stili i jetesës dhe sëmundjet kronike, si diabeti dhe hipertensioni, po kontribuojnë në rritjen e rasteve me probleme të veshkave. 850 milion njerëz në mbarë botën vuajnë nga këto probleme ndërsa 1 në 10 ka një dëmtim të funksionit të veshkave.

Ekspertët e cilësojnë këtë situatë si një epidemi. Mjekët nefrologë thonë se as Shqipëria nuk përjashtohet nga ky trend dhe japin alarmin për rritjen e rasteve tek moshat e reja, kryesisht për shkak të faktorëve të lidhur me stilin e jetesës.

“Sëmundjet e veshkave konsiderohen si vrasës të heshtur, duke bërë që shumë pacientë të mos i kapin ato në faza të hershme dhe të përfundojnë në dializë apo transplant”, thotë Matilda Imeraj, Nefrologe, QSUT.

Raportet tregojnë se sëmundjet e veshkave kanë përparuar me shpejtësi. Sipas të dhënave globale, në vitin 1990 këto sëmundje renditeshin në vendin e 19 për sa i përket vdekshmërisë, ndërsa deri në vitin 2040 pritet të ngjiten në vendin e 5.