Eksperti dyshon se procesi i testit të drogës te policët mund të jetë ndërprerë

Eksperti i sigurisë, Fation Softa dyshon se procesi i testit të drogës te punonjësit e policisë mund të jetë ndërprerë, pasi nuk ka më informacione.

Në emisionin “Mirëmëngjes” në “Euronews Albania”, Softa u shpreh se ky proces mund të ketë ndaluar për shkak se numri i policëve që janë përdorues të drogës ka rezultuar i lartë.

Sipas tij, kjo mund të ndikojë negativisht në perceptimin e publikut për strukturat e policisë.

“Fakti që ndaloi ky lloj informacioni që publiku nuk e ka, as media dhe ne që jemi të interesuar tregon që ky proces ka ndaluar. Ndoshta kjo përqindje është e ndjeshme dhe mund të ndikojë negativisht në perceptimin e publikut te strukturat e policisë. Nëse unë them se sa policë pinë drogë apo e shpërndajnë drogën, bie besimi”, tha ai.

Softa shtoi se kjo iniciativë e Drejtorit të Përgjithshëm të Policisë Gledis Nano duhet të shkojë deri në fund, pasi testimi ka zbuluar se një numër jo i pakët nga rradhët e uniformave blu konsumojnë drogë.

LEXONI GJITHASHTU

• Toksikologu: Është rritur numri i përdoruesve të drogave
• Shefi i toksikologjisë: Testi i drogës është orientues, por jo i saktë