Eksperti: Rreth 400 mijë hektarë pyje më pak, shkak keqmenaxhimi

“Djegia e pyjeve vjen si pasojë e keq-menaxhimit”. Kështu deklaroi për emisionin ‘Mirëmëngjes’ në Euronews Albania ekspert i çështjeve mjedisore Abdulla Diku.

Eksperti tha se në krahasim me vitin 1938, në Shqipëri ka rreth 400 mijë hektarë pyje më pak.

“Në vitin 1938 krahasuar me para pak vitesh ne kemi rreth 400 mijë hektarë pyje më pak. Kemi edhe pyje më të dobëta edhe nga ana e cilësisë. Jemi vendi më i varfër me pyje në Europë”, u shpreh z. Diku.

Ai nënvizoi se drejtoritë e pyjeve janë në varësi të bashkive dhe nuk janë institucione të centralizuar.

“Në vend që të jetë një institucioni i centralizuar, ne ua kemi dhënë bashkive, të cilat përveç 3 katër bashki që kanë buxhet, bashkitë e tjera me më pak buxhet nuk kanë çfarë të bëjnë asgjë për pyjet”, tha ai.

Sipas tij nuk ka struktura profesioniste në vend dhe nuk ka specialistë që duhet të jenë përgjegjës për një zonë të caktuar.