EMRAT| Fotografonin bravat e dyerve të banesave dhe më pas i vidhnin, 3 të arrestuar në Tiranë

Policia e Tiranë arrestoi 3 persona, pjesë e një grupi që kryente vjedhje në banesa në Tiranë.

Në kuadër të operacionit të koduar “Strategjia” u vunë në pranga shtetasit Alban Mullaymeri, Sergeto Turullaj dhe Gentjan  Kala.

Nga hetimet dyshohet se 3 shtetasit, të organizuar si grup, më datë 7 janar, kanë vjedhur në një banesë në rrugën “Don Bosko”, më datë 10 janar, kanë vjedhur 14 000 euro dhe sende me vlerë në një banesë në rrugën “Dritan Hoxha”, dhe dje, kanë vjedhur në një banesë në rrugën “Don Bosko”.

Pjesëtarët e grupit fillimisht fotografonin bravat e dyerve të banesave. Më pas, pamjet studioheshin nga pjesëtarët e grupit, për të zbërthyer mekanizmin dhe për të mundësuar hapjen, me çelës universal.

Punohet për zbardhjen e vjedhjeve të tjera që mund të kenë kryer këta shtetas.

Materialet procedurale iu referuan Prokurorisë së Tiranës, për veprime të mëtejshme.