Gjykata e Tiranës ka pranuar këtë të enjte kërkesën e Prokurorisë dhe ka caktuar masën e sigurisë “arrest shtëpie” për dy shtetasit, Xhevahir Rrushin dhe Gentjan Tuga, të ndaluar pas protestës së opozitës.

Shtetasi Gentjan Tuga, 47 vjeç, banues në Tiranë, ishte i akuzuar  për veprat penale “Goditjet për shkak të detyrës” dhe “Shkatërrimi i pronës”.

Ky zhvillim ndodhi pas goditjeve me bomba molotov ndaj institucioneve publike gjatë protestës të së hënës, ku u përfshinë edhe disa të mitur.

Nga përleshjet dhe incidentet gjatë protestës, 10 efektivë të policisë mbetën të plagosur, ndërkohë që të lënduar mbetën dhe tre protestues.

Ministri i Brendshëm, Ervin Hoxha, reagoi duke theksuar se një grup individësh kishin kaluar kufijtë e ligjit me veprimet e tyre të dënueshme, duke rrezikuar sigurinë publike.

Nga ana tjetër opozita deklaroi se protesta e 7 tetorit është vetëm fillimi i mosbindjes civile e cila do të shtrihet në të gjitha qytetet deri në arritjen e qeverisë teknike.

LEXONI GJITHASHTU:

• Nga bojkoti i komisionit “Xhafaj” te protesta e opozitës, flet ambasadori i BE
• Protesta e opozitës| Arrestohen dy shtetas, procedohen pesë të tjerë