EMRI/ Finalizohet operacioni “Pjesëtari” në Krujë, kapet i dënuari nga GJKKO

Shërbimet e Komisariatit të Policisë Krujë kanë finalizuar operacionin e koduar “Pjesëtari”, duke kapur dhe ndaluar Armand Dervishi, 35 vjeç, i shpallur në kërkim.

Dervishi ishte i dënuar me 6 vjet e 8 muaj burgim nga Gjykata e Apelit për Korrupsionin dhe Krimin e Organizuar, për veprat penale “Kultivimi i bimëve narkotike” dhe “Prodhimi dhe shitja e narkotikëve”, të kryera në kuadër të një grupi të strukturuar kriminal. Vendimi i Gjykatës së Apelit është lënë në fuqi në vitin 2024.

Në të njëjtin vit, Dervishi u dënua edhe nga Gjykata e Krujës me 9 muaj burgim për veprën penale “Ndërtimi i paligjshëm”.

Policia njofton se kapja e tij u bë e mundur falë administrimit të shpejtë të informacionit operativ mbi vendndodhjen e tij. Materialet procedurale janë referuar Prokurorisë së Tiranës për veprime të mëtejshme.