EMRI| Ishte shpallur në kërkim për vjedhje, arrestohet 36-vjeçari në Durrës

Policia e Durrësit ka përfunduar me sukses operacionin policor të koduar “The Key”, duke arrestuar Alfred Hoxhën, 36 vjeç banues në Durrës, i shpallur në kërkim që prej shtatorit 2024 për një vjedhje të kryer në një banesë në lagjen nr. 18.

Sipas hetimeve, 36-vjeçari, në bashkëpunim me shtetasit me iniciale E. K., 33 vjeçe, dhe F. H., 42 vjeç, të dy të arrestuar më parë, ka organizuar dhe realizuar vjedhjen e një shume parash dhe bizhuterish duke përdorur kopje të çelësit të banesës.

33 vjeçarja e cila punonte si sanitare në këtë banesë, dyshohet se ka siguruar çelësin dhe ia ka dhënë dy vëllezërve F. H. dhe A. H., të cilët kanë kryer vjedhjen.

Në shtator, gjatë kontrollit në banesën e 42 vjeçarit, vëllai i Alfred Hoxhës, policia gjeti dhe sekuestroi një varëse dhe një unazë floriri, një shumë parash dhe një automjet që dyshohet se është përdorur gjatë ngjarjes.

Materialet procedurale i kaluan Prokurorisë pranë Gjykatës së Shkallës së Parë të Juridiksionit  të Përgjithshëm Durrës, për veprime të mëtejshme, për veprën penale “Vjedhja”, kryer në bashkëpunim.

LEXONI GJITHASHTU:

• Durrës, parandalohet përshkallëzimi i një konflikti me armë, arrestohet 35-vjeçari
• I vodhi me dhunë 400 euro punonjësit të një lavazhi, ndalohet 19-vjeçari