Prokuroria e Posaçme kundër Korrupsionit dhe Krimit të Organizuar, në bashkëpunim Oficerët e Policisë Gjyqësore të Drejtorisë së Antiterrorit, kanë përfunduar hetimet dhe kanë dërguar për gjykim dosjen në ngarkim të të pandehurit Bledar Zeneli, i akuzuar për veprat penale të “Nxitjes, thirrjes dhe propagandës për kryerjen e veprave me qëllime terroriste”, në bashkëpunim, “Falsifikimi i letërnjoftimit, pasaportave ose i vizave” dhe “Prodhimit, mbajtjes, blerjes apo shitjes se armëve të ftohta”.
Spak bën me dije se ky i pandehur, në bashkëpunim me persona të tjerë të paidentifikuar për momentin, bënte postime publike nëpërmjet rrjeteve sociale duke shprehur simpati të hapur për sulmet terroriste siç ishin ai i ndodhur në datën 29 Tetor 2020 në Nicë të Francës, sulmi terrorist i ndodhur në Vjenë Austri, në datën 02.11.2020, dhe për të tjera akte terroriste apo veprimeve radikale e ekstremiste. Këto postime i bënte në profilin me emrin Elezi Ibrahimi, në Facebook.
Tashmë dosja mbi të pandheurin Zeneli ka kaluar në Gjykatën e Posaçme ku pritet gjykimi i tij në lidhje me akuzat e ngritura.
LEXO GJITHASHTU:
- Zhdukja e dy personave në Sarandë, familjarët protestë te Drejtoria e Policisë
- “Të na gjejnë trupat të paktën”- Familjarët e të zhdukurve apel Policisë së Shtetit
