Erdogan bisedë telefonike me Trump, në fokus situata në Gaza

Presidenti amerikan, Donald Trump dhe homologu i tij turk, Recep Tayyip Erdogan kanë zhvilluar një bisedë telefonike ku në fokus të diskutimeve ishte situata në Gaza dhe marrëdhëniet dypalëshe midis dy vendeve.

Gjatë komunikimit, presidenti turk deklaroi se vizita e tij në Uashington forcoi më tej marrëdhëniet turko-amerikane dhe se është e rëndësishme të ndërmerren hapa për të forcuar bashkëpunimin midis dy vendeve në të gjitha fushat, veçanërisht në industrinë e mbrojtjes.

Erdogan tha se Turqia po punon me zell për të siguruar paqen dhe qetësinë në të gjithë rajonin, veçanërisht në Gaza, dhe se mirëpret iniciativat që synojnë këtë qëllim. Ai theksoi gjithashtu se Turqia po përshpejton përpjekjet e saj diplomatike për paqe, do të vazhdojë të kontribuojë në vizionin global të paqes dhe se ndërprerja e sulmeve të Izraelit është thelbësore për suksesin e iniciativave që synojnë vendosjen e paqes në rajon.

Biseda telefonike u zhvillua pas takimit që dy udhëheqësit patën në Shtëpinë e Bardhë, me Erdoganin që ngriti një sërë çështjesh me homologun e tij amerikan, duke përfshirë shitjen e avionëve F-16 dhe riintegrimin e Turqisë në programin F-35 pas heqjes së tij pas vendimit të Ankarasë për të blerë S-400 nga Rusia.