Presidenti turk Rexhep Tajip Erdogan tha të shtunën, pasi Turqia rihapi ambasadën e saj në Siri pas 12 vjetësh, se do të mbështesë popullin sirian në rindërtimin dhe rimëkëmbjen e vendit.
Ai tha në kongresin provincial të Partisë së tij për Drejtësi dhe Zhvillim se populli sirian arriti një fitore madhështore duke përmbysur regjimin e Bashar al-Asad, raporton Anadolia.
Erdogan kujtoi se 13 vjet më parë, Turqia lejoi hyrjen e emigrantëve nga Siria që u larguan nga konflikti dhe terrorizmi në vendin e tyre dhe siguroi strehim për rreth katër milionë sirianë.
Ai vlerësoi se Turqia shquhet si një vend kyç në rajon dhe vlerësohet si një “ishull i stabilitetit” në mes të kaosit dhe trazirave.
Flamuri kombëtar turk u ngrit në ndërtesën e ambasadës turke në Damask dhe aktivitetet e ambasadës vazhduan pas 12 vitesh, njoftuan më herët sot mediat turke. Ambasadori aktual turk në Mauritani, Burhan Koroglu, u emërua më 12 dhjetor si i ngarkuar me punë të përkohshme të ambasadës në Damask, ndërsa ministri i Jashtëm turk Hakan Fidan e informoi ambasadorin Koroglu për postin e tij të ri, transmeton Anadolia.
Ambasada turke, e vendosur në rrethin diplomatik të Damaskut, vazhdoi të funksionojë për disa kohë pas fillimit të konfliktit në Siri gjatë regjimit të mëparshëm të Bashar al-Assad, por më 26 mars 2012, ajo ndërpreu aktivitetet e saj të përditshme.
LEXONI GJITHASHTU:
- Siria| Blinken takon Erdogan, kreu i rebelëve apel qytetarëve
- Blinken: SHBA ka pasur kontakte direkte me grupin HTS që përmbysi Assadin
