Kryeredaktori i Gazeta Shqiptare, Erl Murati, në studion e Ilva Now në Euronews Albania thirrjen e sotme të presidentit Ilir Meta për tubim më 2 mars, e shikon si shkëmbim të roleve mes kreut të shtetit dhe opozitës duke qenë se kreu i demokratëve Lulzim Basha është shprehur publikisht për dialog dhe presidenti ka marrë rolin që dje e kishte opozita, të dalë në rrugë.
I pyetur nëse kjo lëvizje e presidentit lidhet me një përpjekje për të dëmtuar procesin e hapjes së negociatave në pranverë, Erl Murati u shpreh i bindur se tashmë ky vendim është marrë dhe është shumë vonë për presidentin i cili sipas tij nuk ka fuqi ta bëjë një gjë të tillë.
Teksa i rikujtoi nënkryetarit të PD, Edi Paloka uljen në tryezën për reformën zgjedhore me një njeri si Damian Gjikunuri të cilin PD vazhdimisht e ka konsideruar si hajdut votash, z. Murati tha se kjo e bën PD të pabesueshme në sytë e publikut.
“Me afrimin e marsit opozita bëri një lëvizje të çuditshme duke u ulur në tryezë me Damian Gjiknurin, të akuzuar nga PD për vjedhje votash. Mendoj se nëse është i vërtetë pretendimi i opozitës se Gjiknuri vjedh vota, sa besim duhet të kem unë si publik”, tha z. Murati.
Sipas Muartit, mungesa e Gjykatës Kushtetuese e ka thelluar edhe më tej krizën, e cila do të ishte më e menaxhueshme nëse ky institucioni i rëndësishëm që u shkri plotësisht pas vetingut, do të ishte ende në këmbë.
Për kryeredaktorin e GSH.al, përplasja e institucionit të presidentit me parlamentin dhe qeverinë nuk është diçka e re dhe ka ndodhur edhe në kohën kur opozita e sotme ishte në pushtet, kjo sipas tij edhe për shkak të mungesës së një ligji organik që rregullon punën e presidentit.
