Euronews zbardh emrat e të dyshuarve për rrëmbimin dhe vrasjen e Klevis Lleshit

Euronews Albania ka arritur të sigurojë emrat e personave të akuzuar nga SPAK në lidhje me rrëmbimin dhe vrasjen e Klevis Lleshit.

Të arrestuar për këtë ngjarje janë Sabah Nuzi dhe Samet Loka, të dy 31 vjeç, të cilët akuzohen për veprat penale: Vrasje për gjakmarrje, fshehje dhe asgjësim kufome, pastrim i produktit të veprës penale, grup i strukturuar kriminal, si dhe vepra penale të kryera nga grup i strukturuar kriminal.

Ndërkohë, në kërkim janë shpallur Aurel Hoxha, i njohur edhe me emrin Aurelinjo Kalaveri, 36 vjeç, dhe shtetasi Sajmir Kolaveri, të dy të dyshuar për të njëjtat akuza.

Kujtojmë që SPAK ka zbardhur pas pesë vitesh vrasjen e Klevis Lleshit, të riut nga Burreli që u zhduk në gusht të vitit 2020 dhe u gjet i groposur dy vite më vonë në një fshat të Kurbinit.

Sipas burimeve, ngjarja është zbardhur përmes transkriptimeve të komunikimeve në aplikacionin Sky ECC.

Prokuroria e Posaçme ka lëshuar katër urdhër-arreste, ndërsa si porositës i dyshuar i vrasjes identifikohet Aurel Hoxha, pronar i lokalit “Monopol” në zonën e Myslym Shyrit në Tiranë.

Aurel Hoxha dyshohet se ka porositur vrasjen për hakmarrje, pas vrasjes së të vëllait, Agim Hoxha, në vitin 2012 në Angli.

Identifikimi i Klevis Lleshit u bë në shkurt 2023, pasi banorët e fshatit Shpërdhet të Kurbinit gjetën mbetje kockore. Analiza e ADN-së nga Instituti i Policisë Shkencore konfirmoi identitetin e viktimës.

LEXONI GJITHASHTU:

• SPAK zbardh vrasjen e Klevis Lleshit: Hakmarrja mes dy fiseve që shkaktoi 4 viktima
• Si transkriptimet e SKY ECC zbardhën rrëmbimin dhe vrasjen e Klevis Lleshit në 2020
• Vrasja e Klevis Lleshit, policia kontrolle në një lokal te “Myslym Shyri”