Eurostat: Shqipëria, e parafundit në Europë për shpenzimet në kërkim dhe zhvillim

Shqipëria i ka dedikuar një buxhet të ulët kërkimit dhe zhvillimit në dije dhe teknologji. Në mesataren e Bashkimit Europian shpenzimi në këto fusha arrin në 0.7% të prodhimit të Brendshëm Bruto, ndërsa në vendin tonë 0.2%.

Shqipëria renditet ndër vendet me nivelin më të ulët të shpenzimeve qeveritare për kërkim dhe zhvillim në Europë. Sipas të dhënave më të fundit të Eurostat, për vitin 2024 buxheti i alokuar nga qeveria shqiptare për kërkim-zhvillim ishte vetëm 0.19% e PBB-së, ose 40.9 milionë euro në vlerë absolute.

Kjo e vendos Shqipërinë në vendin e parafundit në kontinent, duke lënë pas vetëm Rumaninë.

Në krahasim, mesatarja e Bashkimit Europian ishte 0.71% e PBB-së, me një vlerë totale prej afro 128 miliardë euro të alokuara nga buxhetet qeveritare. Diferenca është e thellë dhe tregon për mospërputhje serioze mes Shqipërisë dhe vendeve që investojnë në mënyrë të qëndrueshme në dijen dhe zhvillimin teknologjik.

Ekspertët e lidhin këtë nivel të ulët shpenzimesh në Shqipëri me mungesën e vëmendjes institucionale ndaj kërkimit shkencor dhe me strukturën e ekonomisë shqiptare, e cila është e përqendruar kryesisht në sektorë si ndërtimi dhe turizmi – të cilët nuk nxisin kërkim, teknologji apo risi.

Sipas Eurostat, investimet publike në kërkim dhe zhvillim janë të domosdoshme për konkurrueshmërinë dhe zhvillimin e qëndrueshëm, ndaj mbetja në fund të listës përbën një thirrje për reflektim dhe ndryshim të drejtimit strategjik të vendit.

LEXONI GJITHASHTU:

• Arsimi profesional në rritje, kurset garantojnë punësim dhe pagesë të mirë

• Hapet Skema e Investimeve në Bujqësi, 20 milionë euro mbështetje për 9 programe