Fermerët e Muriqanit drejt falimentimit pas përmbytjeve dhe ngricave në Elbasan

Përmbytjet dhe ngricat e ditëve të fundit kanë shkaktuar humbje të mëdha ekonomike për fermerët e fshatit Muriqan, në Elbasan. Brenda pak ditësh, puna e një viti të tërë është shkatërruar, duke lënë shumë familje pa të ardhura dhe të zhytura në borxhe të pashlyera.

“Kemi ngelur në dorë të Zotit, nuk dimë ç’të bëjmë. Është shumë e vështirë të shohësh gjithë mundin të shkatërruar. Është njësoj si të kesh një fëmijë të vogël, ta mbash gjithë natën në vëzhgim e të përpiqesh ta çosh në spital. Edhe këto prodhime ashtu janë për ne. Na iku gjithçka, asnjë lloj fitimi. Shkuam në komunë, por atje vetëm hapin krahët dhe thonë se ka edhe më keq. E di që ka më keq dhe më vjen keq për ata që janë mbytur, por ne s’kemi ç’të bëjmë,” – shprehet Bashkim Shilla, fermer.

Sipas tij, prodhimi bujqësor është dëmtuar pothuajse tërësisht, ndërsa çdo shpresë për fitim është zeruar. Kostoja e fidanëve, puna njëvjeçare dhe shpenzimet për mirëmbajtjen kanë shkuar dëm.

Fermeri tregon se humbjet financiare arrijnë në disa milionë lekë, në një kohë kur familja e tij jeton vetëm me një pension të vogël dhe pa burime të tjera të ardhurash.

“Ne jemi pensionistë me rrogë të vogël, gruaja nuk merr fare. Sa mund dhe sa punë ka kjo tokë? Tërë vitin vetëm këtë bëjmë: heqim lakrën, mbjellim sallatë, domate, por çmime nuk ka. Humbja shkon tre apo katër milionë lekë. Kaq pata mundësi të bëja dhe tani dola ‘bilbil’. Lekët e fidanëve nuk i kam shlyer, i detyrohem furnitorit dhe ai i kërkon. Ne nuk kemi të ardhura të tjera, vetëm këtë kemi. I lutemi shtetit të vërë dorën në zemër,” – thotë Shilla.

Situata përkeqësohet edhe më shumë nga mungesa e tregut dhe çmimet e ulëta të produkteve bujqësore, çka e bën pothuajse të pamundur rimëkëmbjen pas fatkeqësive natyrore.

Fermerët e zonës i bëjnë thirrje shtetit për ndërhyrje të menjëhershme, duke kërkuar dëmshpërblim dhe politika konkrete për mbështetjen e bujqësisë dhe familjeve të prekura.