Fermerët në Jagodinë eksperimentojnë me prodhimin biologjik të domates

Në serat e fermerit Osman Stafa në Jagodinë ka nisur prej javësh vjelja e domates. Bashkë me tre djemtë e tij, ai kultivon rreth 2 hektarë sera, ku këtë sezon po aplikohet për herë të parë mbrojtja biologjike e bimëve, duke shmangur përdorimin e pesticideve kimike.

Sipas fermerit, investimi në metoda më të sigurta dhe cilësore po jep rezultate, ndërsa produkti po del në treg si më i pastër dhe më i kërkuar nga konsumatorët.

“Kam 20 dynymë sera, rreth 2 hektarë. Domatja është shumë cilësore dhe e pastër, pasi kemi futur insekte biologjike. Pra, e kemi pa spërkatje dhe pa pesticide.”-shprehte Osman Stafa, fermer.

Aktualisht, domatja del nga sera me një çmim rreth 100 lekë për kilogram, ndërsa në tregjet e Tiranës dhe Elbasanit shitet deri në 300 lekë për kilogram.

Fermerët thonë se kjo diferencë e madhe çmimi në zinxhirin e tregtimit po rëndon konsumatorin, por nuk sjell domosdoshmërisht fitim më të lartë për prodhuesin.

“Unë e shes me 100 lekë, ndërsa qytetari e blen 200–300 lekë. Më vjen keq për konsumatorët.”-tha më tej fermeri.

Sipas tij, çmimi aktual është kufiri minimal për të mbuluar kostot e prodhimit.

“Çmimi të paktën duhet të qëndrojë tek 100 lekë që ne t’ia dalim, sepse ka shumë shpenzime.”-vijoi ai.

Fermerët kërkojnë më shumë kontroll në zinxhirin e tregtimit dhe krijimin e mekanizmave të drejtpërdrejtë të shitjes, për të shmangur abuzimet me çmimet dhe për të rritur përfitimin e prodhuesve.