Financim i ri për bashkitë, vitin tjetër fondet do të ndahen sipas Censit

Bashkitë e vendit mund të marrin më shumë ose më pak fonde vitin e ardhshëm. Paratë do të përcaktohen, në bazë të rezultateve të CENSIT për popullsinë dhe banesat.

Popullsia e Shqipërisë dhe numri i banesave që do të dalin nga CENSI 2023, do të ndryshojnë skemën e financimit të bashkive në vend. INSTAT do të publikojë të dhënat në muajin qershor, ndërsa në fundit të vitit do të jetë Ministria e Financave, ajo që do të bëjë rishpërndarjen e fondeve për 61 njësitë e pushtetit lokal.

Deri më tani fondet për bashkitë janë bërë sipas një formule që lidhet me administrimin e tyre në 42 funksione, por me panoramën e re që do të japë CENSI do të ndërtohet edhe formula e re e transfertës së pakushtëzuar.

Në Strategjinë për Menaxhimin e Financave hedhur për konsultim publik, thuhet se gjetjet e Censit do të shërbejnë për të parandaluar dhe korrigjuar veçanërisht çrregullimet demografike të dekadës së fundit.

Bazuar në të dhënat periodike të INSTAT, numri i banorëve nuk mendohet të jetë më i lartë apo njëjtë me një dekadë më parë, sikundër edhe struktura demografike.

Për të ndërtuar rrugë, shkolla e ujësjellës, menaxhuar mbetjet apo për t’u mbrojtur nga zjarret e përmbytjet, 61 bashkitë në vend kanë në dispozicion këtë vit 71 miliardë lekë. Në raport me një vit  më parë, buxheti në dispozicion i njësive të pushtetit vendor u rrit me 7.4 miliardë lekë.

LEXONI GJITHASHTU:

• Kush i nxori të dhënat për Censin? Elsa Dhuli: Do mbajnë përgjegjësi para ligjit
• “Censi me probleme”, Dule: Identifikimi i pakicave ka shkelje të të drejtave