Finlanda gati për në NATO, Presidenti nënshkruan ligjet e anëtarësimit

Presidenti i Finlandës nënshkroi ligjet që mundësojnë anëtarësimin e vendit në NATO.

Kjo ishte procedura e fundit pas aprovimit të tyre nga pjesa dërrmuese e Parlamentit finlandez.

Bëhet fjalë për një vendim historik që i jep fund neutralitetit ushtarak dhe që kërkon të përforcojë sigurinë e vendit ndaj agresivitetit të Rusisë fqinje.

Procesi i aderimit të Finlandës në Aleancë do të përfundojë pasi të jetë ratifikuar nga Hungaria dhe Turqia, dy anëtaret e vetme të NATO-s që nuk e kanë bërë ende këtë.

Ankaraja ka dhënë dritën e gjelbër, por jo një datë, ndërsa Parlamenti hungarez ka caktuar 27 marsin.

Por gjërat nuk shkojnë në të njëjtën mënyrë për Suedinë, që kërkoi anëtarësimin në Aleancë majin e kaluar dhe që Parlamenti i saj ratifikoi hyrjen këtë të mërkurë.

Lidhur me këtë, kryeministri suedez ka njoftuar se do të kërkojë sqarime nga Budapesti zyrtar përse Parlamenti hungarez zgjedh të mbështesë Finlandën dhe nga ana tjetër vazhdon të vonojë ratifikimin për Suedinë.

LEXONI GJITHASHTU:

• Finlanda nis ndërtimin e murit në kufi me Rusinë
• Finlanda më afër pranimit në NATO pa Suedinë