Fiorela Shalsi: Duhen 267 vite që burrat dhe gratë në rang global të kenë mundësi të barabarta në ekonomi

Fiorela Shalsi, drejtuese e projektit “Më shumë zgjedhje” deklaroi për emisionin “Mirëmëngjes” në Euronews Albania se do të duhen 267 vite që burrat dhe gratë në rang global të kenë mundësi të barabarta në fushën ekonomike.

“Nga Forumi Ekonomik Botëror, i cili mat hendekun gjinor në botë çdo vit, në vitin e fundit, në 2021, është vënë një nga indikatorët që mat, ekonomia dhe mundësitë që ne kemi. Sipas studimeve që janë bërë në mbarë botën në mënyrë që burrat dhe gratë të kenë mundësi të barabarta në fushën ekonomike do na duhen 267 vite”, u shpreh znj. Shalsi.

Duke iu referuar të dhënave të INSTAT, ajo nënvizoi se vetëm 52% e grave shqiptare janë në treg të punës, në krahasim me një shifër prej 67% të burrave.

“30% e grave nuk e aksesojnë tregun e punës për arsye të kujdesit të familjes”, tha ajo.

Ndërkohë theksoi se interesi për të ndjekur arsimin e lartë është më i madh nga ana e vajzave, sesa nga djemtë.

Në lidhje me projektin, znj. Shalsi tha se është një projekt rajonal që mbulon Shqipërinë, Moldavinë, Kosovën dhe mbështetet nga Agjencia Austriake për Zhvillim.