Forumi i Grave të EPP reagon për deklaratën e Ballës ndaj Vokshit

Forumi i Gruas të Partive Popullore Europiane (EPP) ka reaguar këtë të premte lidhur me gjuhën ofenduese që përdori ditën e djeshme gjatë seancës në Kuvend kreu i Grupit Parlamentar i PS, Taulant Balla, kundrejt deputetes së Partisë Demokratike, Albana Vokshi.

Në reagimin e saj zyrtar, Forumi thekson se sjelljet seksiste dhe poshtërimi personal nuk kanë vend në institucionet demokratike. Ajo gjithashtu i ka bërë thirrje të gjithë aktorëve politikë të përmbahen nga gjuha dhe ndikimet që cenojnë dinjitetin dhe të drejtat e grave, duke theksuar rëndësinë e tyre.

“Reagim i Forumit të Gruas të Partive Popullore Europiane (EPP): Dënojmë me forcë sulmin verbal seksist të kryetarit socialist Taulant Balla

Ne, gratë e EPP, dënojmë me forcë sulmin verbal seksist të kryetarit socialist Taulant Balla, drejtuar ndaj Zëvendëspresidentes sonë Albana Vokshi, gjatë seancës së fundit plenare të Parlamenti i Shqipërisë, ku ai sugjeroi se numri i saj është “0900” – një referencë ndaj një linje telefonike seksuale!

Komentet seksiste dhe poshtërimi personal nuk kanë vend në institucionet demokratike. Mosadresimi i këtij incidenti gjatë seancës është i papranueshëm.

Ne qëndrojmë në solidaritet të plotë me Zëvendëspresidenten tonë dhe u bëjmë thirrje të gjithë aktorëve politikë, veçanërisht atyre të shumicës qeverisëse, të përmbahen nga gjuha dhe sjelljet që shkelin dinjitetin dhe të drejtat e grave.

Respekti dhe toleranca zero ndaj seksizmit duhet të udhëheqin institucionet tona politike!”, thuhet në reagimin e EPP.