FOTO | I dënuari në grupin “Kumanova” shfaq të mbjellat brenda burgut

Anëtari i Grupit “Kumanova”, Demë Shehu, i cili është dënuar me burgim të përjetshëm, ka publikuar disa fotografi nga kopshti brenda hapësirave të burgut në Maqedoninë e Veriut, ku po vuan dënimin.

Përmes një postimi në rrjetet sociale, Shehu u shpreh se toka shqiptare është e bekuar dhe se këtë e tregon fakti që mbijnë të gjitha llojet e perimeve.

“Se kjo tokë është Shqiptare dhe e bekuar nga i lumi Zot,e tregon fakti se këtu mbinë të gjitha llojet e perimeve. Kjo tokë e bekuar Shqiptare, e ka ngjajshmërin me fushat e Myzeqes! Kudo që të jemi, kurrë nuk do të rreshtim së mbjelluri farat e çlirimit të tokave tona Ilire-Arbërore-Shqiptare!”, shkroi ai.

Gjykata Themelore e Shkupit ka dënuar me gjithsej 746 vjet burg pjesëtarët e grupit të Kumanovës, të akuzuar për terrorizëm për ngjarjet e 9 dhe 10 majit të vitit 2015.

Asokohe, pati përplasje të armatosura në “Kodrën e Trimave” ku mbetën të vrarë 8 pjesëtarë të forcave policore maqedonase dhe dhjetë pjesëtarë të grupit të armatosur “Kumanova”.

Shumica e pjesëtarëve të këtij grupi ishin nga Kosova, të cilët gjatë kohës së luftës në Kosovës disa kishin qenë edhe pjesë e UÇk-së.