Fotot e shekullit XIX/ Te “Marubi” bëhen me procesin e kolodiumit të lëngshëm

Të gjithë sot realizojmë foto përmes telefonit apo aparateve digjitale fotografike me lehtësinë më të madhe për ti postuar në rrjetet sociale.

Por si janë realizuar këto foto në shekullin e 19?!

Këtë përgjigje do na e japë muzeu kombëtar i fotografisë “Marubi” përmes masterclass-sit dy ditor të realizuar nga fotografi i njohur Maximilian Zeitler mbi procesin e kolodiumit të lëngshëm.

Fillimisht duhet të qëndrosh para aparatit të paktën 20 sekonda pa lëvizur derisa fotoja të marrë formë. Më pas negativi kalon në dhomën e errët.

“Imazhi që është tani në pjatë, por i padukshëm për ne , derisa te realizohet procesi”,-tha Maximilian Zeitler, ekspert fotografie.

Nga dhoma e errët, negativi zhvendoset në një tjetër provëz, ku pas disa minutash, ndodh magjia.

Për ekspertin e fotografisë Maximilian Zeitler ky bashkëpunim me “Marubin” është një moment shumë i rëndësishëm në karrieren e tij ndërsa thotë se përmes këtij trajnimi edhe të rinjtë duhet të njihen me mënyrën se si e kanë realizuar më parë fotografinë.

 “Kjo është një kuti e errët e lëvizshme dhe ne sot në të bëmë foton e parë pas shumë vitesh në Shkodër me kolodium të lëngshëm, që nga vitet e Marubit. Jam i lumtur që 5 të rinjtë që ishin sot këtu e mësuan dhe do e zhvillojnë këtë antikë të vjetër dhe proces historik. është shumë e rëndësishme për të mësuar se si gjërat bëheshin në atë kohë. Shumë foto janë bërë në vitet 1850-1860 nga momente të rëndësishme të historisë së Shqipërisë prandaj është e rëndësishme ta njohim si moment”, tha Maximilian Zeitler, ekspert fotografie.

Për fotografen nga Kosova Majlinda Hoxha ky kurs është i veçantë për mënyrën e tranzicionit të fotos që nga dinastia Marubi në ditët e sotme.

 “Është shumë e rëndësishëm. Jo vetëm e shkuar por dhe shumë e radhës si proces dhe kupton më përbrenda dhe më afër fotografinë. Sidomos fillimet e saj . Procesi të jep një afirmim edhe më të madh sa i përket daljes së fotografisë në pah edhe e ka njëfarë magjie. Kur e ke ekspozimin e parë që del një fotografi , kur e sheh për herë të parë është një magji dhe një dashni e papërshkrueshme”,- tha Majlinda Hoxha, fotografe nga Kosova.

Drejtuesi i muzeut “Marubi” Luçjan Bedeni thotë se ky bashkëpunim lindi rastësisht nga kontakti në rrjetet sociale por produkti është shumë i rëndësishëm.

“Rastësisht ne kemi vërejtë një nga postimet që ka aktualisht i ftuari jonë Maximilian Zeitler i cili vjen nga Gjermania . Kishte postuar dhe komentuar në lidhje me teknikën e vjetër të kolodiumit të lëngshëm”,- tha Luçian Bedeni,  drejtues i Muzeut Kombëtar të Fotografisë “Marubi”.

Ne nuk hezituam për të humb këtë moment dhe i kemi shkruar dhe kështu ka lind komunikimi mes nesh.

“Unë do thoja që kjo është një ngjarje historike  për fotografinë Shqiptare meqenëse e kthejmë këtë teknikë fillimisht të sjellë nga Pietro Marubi në Shqipëri në fillimin e viteve 1860 dhe pas rreth 160 vitesh ne e rikthejmë duke e realizuar sërish me po të njëjtat materiale , me po të njëjtat përzierje kimike”,-tha Luçian Bedeni,  drejtues i Muzeut Kombëtar të Fotografisë “Marubi”.

LEXONI GJITHASHTU:

• Guvernatorja e Meinit: 18 të vrarë nga sulmi masiv, i dyshuari në arrati
• Orban: Jemi krenar që kemi komunikim me Moskën, ndryshe nuk ka mundësi për paqe