Zelensky reagon pas dyshimeve për përdorimin e raketës balistike ndërkontinentale nga Rusia
Presidenti i Ukrainës, Volodymyr Zelensky, ka reaguar pas dyshimeve se Rusia goditi territorin ukrainas me një raketë balistike ndërkontinentale (ICBM). Zelensky tha se të gjitha karakteristikat e mbledhura nga terreni, përfshirë shpejtësinë dhe lartësinë e raketës, sugjerojnë se bëhet fjalë për një raketë ndërkontinentale.
Ai shtoi se ky akt tregon se Presidenti rus, Vladimir Putin, po përdor Ukrainën si një terren trajnimi për të testuar raketa me rreze të gjatë. “Të gjitha karakteristikat — shpejtësia, lartësia — tregojnë se është një raketë balistike ndërkontinentale. Ekzaminimet tani janë duke u zhvilluar. Është e qartë se Putini po përdor Ukrainën si një terren trajnimi,” tha Zelensky.
Po ashtu, ai e cilësoi veprimin e Rusisë si një akt të paturpshëm, duke theksuar se Putini po përçmon dinjitetin, lirinë dhe jetën e njerëzve, duke treguar frikën që ka. “Sot, fqinjët tanë të çmendur treguan edhe një herë se çfarë janë në të vërtetë dhe sa i frikësuar janë. Ata kanë frikë aq shumë, sa që po përdorin tani raketa të reja,” shtoi Zelensky.
Për momentin, Rusia ende nuk ka komentuar mbi pretendimet e bëra nga Ukraina, lidhur me përdorimin e një rakete balistike ndërkontinentale gjatë sulmit të enjten në qytetin e Dnipros.
LEXONI GJITHASHTU:
- Zëdhënëses së Lavrov i bie telefoni në konferencë: E urdhërojnë të mos flasë për…
- Vendimi i Biden për raketat, ekspertët: Mund të ketë pasoja për Trump
