Frikë e pasiguri në Nigeri pas rrëmbimit të 300 nxënësve, çfarë deklaruan prindërit

Prindërit e fëmijëve të rrëmbyer 10 ditë më parë nga Shkolla Katolike e Shën Marisë në Papiri, Nigeri, vazhdojnë të jetojnë në ankth të thellë, duke refuzuar të flasin hapur nga frika e hakmarrjes së rrëmbyesve. Mbi 300 nxënës u rrëmbyen nga persona të armatosur, ndërsa qindra prej tyre ende konsiderohen të zhdukur.

Njëri prej prindërve, i identifikuar nga BBC vetëm si Aliyu, shprehu frikën e tij të madhe:
“Nëse të dëgjojnë të thuash diçka për ta, do të vijnë për ty. Do të vijnë në shtëpinë tënde dhe do të të çojnë në shkurre.”

Ai tha se komuniteti e di përafërsisht zonën ku mbahen fëmijët, por askush nuk guxon të afrohet:
“Është një udhëtim tre orësh me makinë deri te vendi ku fshihen. E dimë ku janë, por nuk mund të shkojmë, është shumë e rrezikshme.”

Aliyu rrëfeu se familjet janë në gjendje të rëndë emocionale:
“Ndihem shumë i hidhëruar dhe gruaja ime nuk ka ngrënë prej ditësh… Na duhet dikush që të na ndihmojë.”

Ngjarja është pjesë e një vale të re rrëmbimesh në Nigerinë veriore dhe qendrore. Vetëm dy ditë pas incidentit, 12 vajza u rrëmbyen në shtetin Borno, ndërsa disa ditë më herët 25 vajza të tjera u morën nga një shkollë në Kebbi. Ushtria nigeriane njoftoi shpëtimin e një grupi prej tyre, por qindra fëmijë mbeten ende në duart e bandave kriminale të njohura si “banditë”.

LEXONI GJITHASHTU:

• Sulmi me dronë pezullon një nga terminalin më të madh të naftës në Rusi
• Rusia lëshon 600 dronë në Ukrainë, vriten tre persona