Frikë nga Specialja? Kadri Veseli i përgjigjet Albin Kurtit: Je veteran i vetëdorëzuar në Serbi!

Kryetari i Partisë Demokratike të Kosovës, Kadri Veseli i ka kthyer përgjigje në “Balkan Talks” kryeministrit në detyrë, Albin Kurtit, i cili ka deklaruar se politikanët kosovarë kanë frikë nga Gjykata Speciale.

Ai u shpreh se nuk ka frikë nga gjykatat, ndërsa theksoi se kryeministri në detyrë është kthyer tashmë në “një veteran të vetëdorëzuar në Serbi”.

“S’e kam besuar kur e kam dëgjuar se çfarë flet. Ai flet për vete. Ai flet për shpirtin e vet. Ai e mban veten veteran i vetëdorëzuar tek Serbia”, tha ai.

Lideri i PDK-së theksoi më tej se ai kurrë nuk ka pasur frikë, ndërsa shtoi se kjo është një nga karakteristikat e luftëtarëve të UÇK-së.

“Edhe në vitin 1999 unë kurrë nuk jam dorëzuar. Unë jam krenar që kam qenë pjesë e Ushtrisë Çlirimtare të Kosovës. Ai (Albin Kurti) mendon se shpirti i tij frikësohet nga gjykatat. Ne nuk frikësohemi. Ta them pak më troç: Unë çdo sekondë të jetës time në Ushtrinë Çlirimtare të Kosovës jam krenar. Kam qenë që nga dita e parë, që nga themelimi. Kam qenë çdo ditë në UÇK, dhe do të vdes si ushtar i lirisë dhe si ushtar i UÇK. Ky është mesazhi: Kush është luftëtar nuk frikësohet. Ne që kemi mbetur gjallë pas 1999, tani e kemi këtë jetë si shpërblimi nga Zoti dhe faleminderit nga populli ynë për përkrahjen, përndryshe frikacakët dhe qyqarët mendojnë ashtu, por burri dhe luftëtari kurrë!”, shtoi ai.

Lexoni gjithashtu: 

Kurti: S’bëjmë dot pa SHBA, Gjykata Speciale funksionon si një fantazmë

Albin Kurti për ‘Ilva Now’: VV është dyfishuar, i mundim sikur të gjitha partitë të bëhen bashkë