FSHF zyrtarizon skemën e re të “Final 4”, hidhet shorti Superligës (Kalendari)

Federata Shqiptare e Futbollit ka zyrtarizuar të premten skemën e re të kampionatit “Abissnet Superiore” për sezonin 2025–2026, i cili do të jetë edicioni i 87-të në histori. Gjatë ceremonisë së organizuar në ambientet e “Shtëpisë së Futbollit”, u hodh edhe shorti për kalendarin e sezonit të ri, që pritet të startojë më 23 gusht dhe të përfundojë në maj të vitit të ardhshëm.

Skema e re: “Final 4” përcakton kampionin

Ndryshimi kryesor për këtë sezon lidhet me fazën përmbyllëse të kampionatit, e quajtur “Final 4”. Pas përfundimit të 36 javëve të sezonit të rregullt, katër skuadrat e para në renditje do të kalojnë në një fazë të re mini-turneu.

Në këtë fazë, pikët e secilës skuadër do të përgjysmohen dhe çdo ekip do të zhvillojë tre ndeshje, me gjithsej gjashtë takime që do të luhen në stadiumin “Air Albania”. Skuadra që do kryesojë renditjen pas këtij mini-turneu do të shpallet kampione, ndërsa do të përcaktohen edhe përfaqësuesit në kupat evropiane.

Skema e fazës “Final 4”:

Java 1:

• Vendi i parë vs Vendi i katërt
• Vendi i dytë vs Vendi i tretë

Java 2:

• Vendi i parë vs Vendi i tretë
• Vendi i dytë vs Vendi i katërt

Java 3:

• Vendi i parë vs Vendi i dytë
• Vendi i tretë vs Vendi i katërt

Në rast barazimi pikësh, renditja përcaktohet në bazë të pikëve në ndeshjet direkte, diferencës së golave në to, si dhe diferencës së përgjithshme të golave gjatë gjithë sezonit.

Përballjet e javës së parë në Superligë:

• Partizani – Vora
• Teuta – Dinamo City
• Vllaznia – Egnatia
• AF Elbasani – Flamurtari
• Bylis – Tirana

Rregullat e sezonit:

• Kampionati do të zhvillohet me katër faza vajtje-ardhje (36 javë).
• Vendet 1–4 shkojnë në “Final 4”.
• Vendet 9 dhe 10 zbresin direkt nga kategoria.
• Vendi i 8-të do të luajë në “play out”.

Në edicionin e ri do të marrin pjesë 10 skuadra:

Egnatia, Vllaznia, Dinamo City, Partizani, AF Elbasani, Teuta, Bylis, Tirana, Vora dhe Flamurtari.

KLIKO KËTU ( Kalendari i plotë )