GJKKO rrëzoi kërkesën e Belerit, Dule: Vendim i orkestruar nga Edi Rama

Një vendim që cenon shtetin e së drejtës dhe prezumimin e pafajësisë e cilësoi kreu i PBDNJ, Vangjel Dule vendimin e GJKKO për të rrëzuar kërkesën e Belerit për t’u betuar si kryebashkiak i Himarës.

Në një deklaratë për mediat pas vendimit të gjykatës, Dule tha se vendimi i sotëm është orkestruar nga Edi Rama.

“Çështja Beleri nuk është asgjë më tepër sesa një kakofoni drejtësie ku tekstin, muzikën dhe orkestrimin e realizon një autor ekskluziv, Edi Rama kryeministri. Belerit prej muajsh, i privohet e drejta themelore, ndërsa qytetarëve u privohet e drejta për të zgjedhur. Çështja është një dhe e vetme: Rama kërkon me çdo kusht të mbajë në krye të bashkisë së Himarës një kryetar që nuk e kanë votuar qytetarët me qëllim që të vazhdojë aferat korruptive që kanë qëllim tjetërsimit e statusit pasuror të pronave të Himarës. Kjo nuk është një ndërhyrje në punët e drejtësisë por një mendim që mund të shprehim për një vendim. Ndërhyrje në drejtësi është ajo që dëgjuat në intervistën e kryeministrit Rama. Janë momente shumë të vështira që krijojnë precedent të rrezikshëm që cenon shtetin e së drejtës, prezumimin e pavarësisë”, – u shpreh Dule.

Beleri ndodhet në paraburgim me akuzën për blerje votash për zgjedhjet lokale të 25 prillit të këtij viti.

LEXONI GJITHASHTU:

• GJKKO merr vendimin për Fredi Belerin
• Gjykata tërhiqet për vendim, Beleri akuza: Po mbahem në burg për interesa të Ramës