GJK|Seanca për mandatin e Xhaçkës, Bardhi: Rama i ka dhënë statusin e të paprekshmes

Ditën e sotme është zhvilluar në Gjykatën Kushtetuese seanca për mandatin e deputetes së PS-së, Olta Xhaçka.

Opozita pretendon se mandati i Xhaçkës duhet të ‘digjet’ pasi sipas tyre, ajo ka përfituar pasuri publike nga buxheti i shtetit, përmes bashkëshortit të saj i cili u shpall investitor strategjik.

Gjatë fjalës së tij në Gjykatë, kreu i grupit parlamentar të PD-së, Gazment Bardhi, është shprehur se kryeministri Edi Rama ka vendosur t’i japë Xhaçkës statusin e të paprekshmes.

Ai i kërkoi Gjykatës Kushtetuese që të shprehej lidhur me Kuvendin që nuk i është bindur vendimeve të kësaj gjykate, pasi sipas Bardhit, kjo tregon se ka rënë çdo parim i shtetit të së drejtës.

“Xhaçka në kundërshtim me ligjin ka përfituar pasuri nga pasuritë e shtetit. Xhaçka do të duhet të kishte humbur mandatin e deputetes, por Rama ka vendosur t’i japë statusin e të paprekshmes.

Kuvendi ka vendosur që për interes personal të injorojë zbatimin e vendimeve të Gjykatës Kushtetuese. Vendimet e GJK janë vetë Kushtetuta e Shqipërisë. Prandaj të nderuar anëtarë të GJK, është e vërtetë që është krijuar një konflikt kompetencash mes 1/10 dhe Kuvendit të Shqipërisë, por mbi të gjitha kjo çështje ka të bëjë me autoritetin e vendimeve të GJK.

Nëse kjo gjykatë do të pranonte standartin që Kuvendi si organ kushtetues i pavarur nuk i bindet Kushtetutes, pra vendimeve të GJK, këtu ka rënë çdo parim i shtetit të së drejtës”, tha Bardhi.

LEXONI GJITHASHTU:

• Olta Xhaçka: Stabiliteti në rajon është kritik, duhet mbështetje e fuqishme nga BE
• Olta Xhaçka: Marrëveshja Kosovë-Serbi ndikon në forcimin e stabilitetit në rajon