Gjoba ndaj djalit të xhaxhait, në pranga inspektori i IKMT që kanosi drejtorin e tij

Një inspektor i IKMT Kukës, i identifikuar si Defrim Haziraj, është arrestuar nga policia e këtij qyteti pasi ka kërcënuar drejtorin e institucionit ku punon, pas një gjobe që ky i fundit i kishte vendosur djalit të xhaxhait të tij, një ndërtues.

Hetimet treguan gjithashtu se inspektori ka shpërdoruar detyrën, duke mos ndërmarrë masa për parandalimin e gërmimit të tokës nga djali i xhaxhait të tij pa lejen përkatëse, në Krenzë të Kukësit.

Kjo shkelje ra në sy të drejtuesit të IKMT, i cili urdhëroi një inspektim dhe më pas ndëshkimin e shkelësit.

Vendimi duket se nuk u prit mirë nga vartësi i tij, i cili ka kërcënuar me jetë drejtorin e IKMT.

Krahas arrestimit të inspektorit, policia procedoi edhe ndërtuesin për shpërdorim të tokës.

Njoftimi policisë

“Specialistët për Hetimin e Krimeve në Komisariatin e Policisë Kukës arrestuan në flagrancë shtetasin Defrim Haziraj, 46 vjeç, banues në Kukës, me detyrë Inspektor pranë IKMT Kukës, për veprat penale “Shpërdorimi i detyrës” dhe “Kanosja për shkak të detyrës”, pasi drejtori i IKMT Kukës, shtetasi B. T., bëri kallëzim se ishte kanosur nga Haziraj lidhur me një akt konstatimi për gërmimin e tokës nga shtetasi M. L. (djali i xhaxhait të arrestuarit). Gjithashtu, shtetasi M. L., 33 vjeç, banues në Kukës, u referua në Prokurori dhe ndaj tij filloi procedimi penal në gjendje të lirë për veprën penale “Shpërdorimi i tokës””, njofton policia.

Materialet procedurale iu referuan Prokurorisë për veprime të mëtejshme.

LEXONI GJITHASHTU:

• Humb jetën punëtori në Elbasan, ra nga lartësia! Arrestohet administratori
• PAMJE/ Goditet grupi i prodhimit të marihuanës në Spanjë, arrestohen 9 shqiptarë