Gjykata Administrative rrëzon padinë e Gentian Ndojit: Përzgjedhja e Joni Ketës në krye të BKH, e ligjshme

Gjykata Administrative e Apelit me 3 vota pro dhe asnjë kundër vendosi që përzgjedhja e Joni Ketës në krye të BKH është e ligjshme. Gjykata rrëzoi padinë e Gentian Ndojit i cili ishte në gare për kreun e “FBI shqiptare”.

Ndoji në kërkesën e tij theksoi se ai është renditur i pari me më shumë pikë në vlerësimin e bërë nga Komisioni Përzgjedhës i ngritur nga Prokuroria e Posaçme për vlerësimin e kandidaturave. Sipas Ndojit, posti i takonte atij dhe jo Joni Ketës.

Këshilli i Lartë i Prokurorisë votoi më 9 dhjetor për propozimin e SPAK-ut për kreun e ri të Byrosë Kombëtare të Hetimit. Me 11 vota pro dhe asnjë votë kundër, Joni Keta u emërua drejtor i BKH-së për një mandat 5-vjeçar.

Mbledhja e KLP-së u zhvillua në prani të përfaqësuesve amerikanë, pjesë e misionit të asistencës për SPAK-un. Pas plotësimit të procedurave dhe shqyrtimit të materialeve, anëtarët e KLP-së miratuan unanimisht kandidaturën e Joni Ketës për drejtimin e Byrosë Kombëtare të Hetimit.

Vendimi:

Gjykata, bazuar në Nenin 40/3 të Ligjit Nr.49/2012 “Për gjykatat administrative dhe gjykimin e mosmarrëveshjeve administrative”, i ndryshuar, unanimisht:

VENDOSI

1. Rrëzimin e padisë.

2. Shpenzimet gjyqësore i lihen në ngarkim palës paditëse.

3. Kundër këtij vendimi lejohet rekurs brenda 30 ditëve në Kolegjin Administrativ të Gjykatës së Lartë, afat që fillon nga e nesërmja e njoftimit të vendimit të arsyetuar.

U shpall në Tiranë, në datë 07.04.2026.