Gjykata e Bangladeshit lëshon urdhër-arrestin për ish-kryeministren, Hasina

Një gjykatë lokale në Bangladesh ka lëshuar një urdhër arresti për ish-kryeministren Sheikh Hasina, e cila aktualisht ndodhet në Indi.

Ajo akuzohet për krime kundër njerëzimit, lidhur me protestat masive të studentëve që ndodhën në korrik dhe gusht të këtij viti.

Urdhri u lëshua nga Gjykata Ndërkombëtare e Krimeve, e cila u riorganizua nga qeveria kalimtare e udhëhequr nga Muhammad Yunus.

Përveç Hasinës, janë lëshuar urdhra arresti për 45 individë të tjerë, përfshirë Sekretarin e Përgjithshëm të Ligës Awami, Obaidul Quader.

Kryeprokurori Tajul Islam njoftoi se gjykata ka kërkuar që Hasina të paraqitet në gjykatë deri më 18 nëntor.

Protestat e studentëve rezultuan në vdekjen e të paktën 736 personave dhe plagosjen e mbi 20,000 të tjerëve, shumë nga të cilët u goditën nga policia dhe mbështetësit e Ligës Awami.

Hasina dhe partia e saj janë akuzuar për vrasje, zhdukje me forcë dhe madje gjenocid.

Përveç kësaj, gjykata ka sinjalizuar se mund të kërkojë ndihmën e Interpolit për të sjellë Hasinën dhe anëtarët e tjerë të partisë në Bangladesh.

LEXONI GJITHASHTU:

• Dyshohet se pati gisht në vrasjen e një burri, gjykata nis hetimet për Sheikh Hasina
• Ish-kryeministrja e Bangladeshit, Hasina: SHBA qëndron pas rrëzimit tim