Gjykata e Romës në favor të Melonit, në janar rinis sjellja e emigrantëve në Gjadër

Qeveria italiane do të ketë të drejtë të vendosë se cili shtet bën pjesë te vendet e sigurta. Vendimi i Gjykatës së Romës ka shkuar në favor të kryeministres Giorgia Meloni, sa i takon çështjes së refugjatëve që do të qëndrojnë në kampet e ngritura në Gjadër.

Gjykata e Kasacionit, me një vendim të fundit, saktëson se është në tagrin e qeverisë italiane të vlerësojë si të sigurta apo jo vendet nga ku vijnë emigrantët. Ky është një konfirmim i vendimit të marrë më 19 dhjetor 2024, i cili sqaroi rolin e gjyqtarit të zakonshëm në lidhje me përcaktimin e vendeve të sigurta të origjinës, duke nënvizuar kufirin e kompetencave të tij.

Gjyqtari vendos për rastet individuale dhe efektivitetin e të drejtës themelore për lirinë personale, por i takon ministrit të Punëve të Jashtme dhe ministrive të tjera që kanë lidhje me çështjen të thonë fjalën e fundit për rastet në tërësi.

Vendimi vjen pas ankesave të paraqitura nga qeveria kundër moskonfirmimeve fillestare për mbajtjen e emigrantëve në Shqipëri, të dhëna nga seksioni i emigracionit të Gjykatës së Romës.

Ndërkohë, Meloni deklaroi pak ditë më parë se do të vazhdojë me planin e saj, i cili pritet të rinisë në janar 2025.

LEXONI GJITHASHTU:

• Gazetarja italiane: Meloni po insiston me çdo kusht për marrëveshjen e emigrantëve
• Meloni e vendosur: Qendrat e pritjes së emigrantëve në Shqipëri do jenë funksionale