Gjykata Kushtetuese e riktheu në detyrë, reagon për herë të parë Erion Veliaj

Erion Veliaj ka reaguar për herë të parë pas vendimit të Gjykatës Kushtetuese që vendosi ta rikthente në detyrë duke rrëzuar vendimin e shkarkimit nga Këshilli i Ministrave.

Përmes një postimi në faqen e vet në Facebook Veliaj shprehet se vendimi i Kushtetueses “nuk është një vendim për një njeri, por për demokracinë shqiptare, për votën e lirë dhe për çdo qytetar që beson se pushteti buron nga populli dhe i përket atij”.

Reagimi i plotë i Veliajt

Të dashur miq,

Për shkak të kushteve ku ndodhem, vetëm tani munda të çoj këtë pusullë-postim me avokatët.

Drejtësia kushtetuese foli.

Vendimi i Gjykatës Kushtetuese nuk ishte një vendim për të më kthyer mandatin mua, por për t’ua kthyer atyre që ju përket, popullit të Tiranës.

Ky nuk është një vendim për një njeri, por për demokracinë shqiptare, për votën e lirë dhe për çdo qytetar që beson se pushteti buron nga populli dhe i përket atij.

Gjykata Kushtetuese rivendosi jo thjesht një mandat, por dinjitetin e ligjit dhe besimin se shteti ka ende busull. E drejta mund të vonojë, por nuk harron.

Faleminderit çdo qytetari të Tiranës që besoi, që priti dhe që nuk u dorëzua.

Unë do të bëj çdo gjë që është në dorën time, që puna të vijojë, dhe do të kërkoj pa u ndalur që të mos pengohem në ushtrimin e mandatit që më keni besuar.

Tirana nuk ndalet. Ju dua shumë!

Më 3 nëntor Gjykata Kushtetuese dha vendimin përfundimtar në lidhje me fatin e kryebashkiakut të Tiranës, Erion Veliaj.

Me 5 vota pro dhe 3 kundër, Gjykata rrëzoi vendimin e qeverisë për shkarkimin e tij, duke e cilësuar antikushtetues.

LEXONI GJITHASHTU:

• Vendimi për Veliajn/ Përfundon mbledhja, zbulohet çfarë i tha Rama deputetëve
• Veliaj fitoi në Kushtetuese, e komenton Jorida Tabaku: Çorba po gatuhet