Gjykata nuk i dha vulën Berishës, Alibeaj bën ‘lëvizjen e radhës’ të hënën

Një ditë pasi gjykata e Apelit vendosi të mos i jepte vulën e PD-së, ish-kryeministrit Sali Berisha, Enkelejd Alibeaj, ka njoftuar mbledhjen e Grupit Parlamentar Demokrat dhe Kryesisë së PD-së hënën.

Bëhet me dije se në fokus të mbledhjes së strukturave të PD-së nga Alibeaj do të jetë qëndrimi i Partisë Demokratike mbi zhvillimet e fundit në raport me zgjedhjet lokale.

“Ditën e hënë, datë 6 Mars 2023, ora 12:00, do të zhvillohet mbledhja e Grupit Parlamentar, me rend dite: “Situatën politike dhe qëndrimin e Partisë Demokratike mbi zhvillimet e fundit në raport me zgjedhjet lokale të 14 Majit”. Ju falenderoj!”, njofton Alibeaj.

Kujtojmë se paralelisht me Alibeajn, edhe Berisha ka mbledhur strukturat e partisë këtë fundjavë, ku këtë të shtunë u zhvillua një mbledhje e Kryesisë së PD-së në selinë blu.