Gjykata Themelore hedh poshtë padinë kundër ZRRE-së për shtrenjtimin e energjisë

Gjykata Themelore në Prishtinë e ka hedhur poshtë padinë e një grupi aktivist kundër rregullatorit të energjisë në Kosovë në lidhje me shtrenjtimin e rrymës, njoftoi të mërkurën avokati i grupit, Ardian Bajraktari.

Bajraktari shkroi në Facebook se ka pranuar aktvendimin e Gjykatës Themelore, sipas të cilit kërkesa e grupit “Asnji cent ma shumë” për padi ndaj Zyrës së Rregullatorit të Energjisë e Kosovës (ZRRE) është refuzuar.

Ai njoftoi se grupi do të ankohet në Gjykatën e Apelit kundër vendimit të Themelores.

“Beteja ligjore kundër vendimit të ZRRE-së për ngritjen e çmimit të energjisë vazhdon”, shkroi ai.

Rregullatori i energjisë e miratoi më 11 prill rritjen e çmimeve për tarifat e energjisë elektrike për 16.1 për amvisëri dhe biznese që kanë deri në 50 punëtorë, duke nxitur protesta.

Tarifat e reja u miratuan më 16 prill dhe u futën në fuqi më 1 maj.

Grupi “Asnjë cent më shumë” zhvilloi disa protesta gjatë kohës kur ZRRE-ja po shqyrtonte rritjen e çmimit të rrymës dhe asokohe paralajmëroi padi ndaj saj.

Ngritja e çmimit të rrymës ka çuar edhe në rritjen e çmimeve të produkteve themelore.

Çmimi prej 50 centësh për një bukë tashmë ka ndryshuar shumëkund në Prishtinë: në disa furra buka blihet për 60 centë, e në disa të tjera për 80 centë.

Në disa kafene dhe restorante të kryeqytetit të Kosovës, çmimi për një kafe është ngritur nga 1 euro në 1.5 ose në 2 euro.

LEXONI GJITHASHTU:

• Kurti takon ambasadorët e shteteve të QUINT-it dhe shefin e BE-së në Kosovë
• Ngërçi në Kuvendin e Kosovës nuk zhbllokohet as pas përpjekjes së 15-të