Gjykatësi cakton 25 marsin 2024, si datë për një gjyq ndaj ish-presidentit Trump

Një gjykatës caktoi të martën 25 marsin 2024 si datë paraprake për një gjyq ndaj ish-presidentit Donald Trump, e cila do të përkonte me kulmin e sezonit për zgjedhjet për kandidatin presidencial brenda Partisë Republikane.

Gjykatësi e njoftoi datën në një seancë, ku zoti Trump mori pjesë përmes videos. Ai kishte deklaruar muajin e kaluar se ishte i pafajshëm për 34 akuza për falsifikim të të dhënave të biznesit.

Në seancën e së martës, gjykatësi i Manhatanit, Juan Merchan shqyrtoi një urdhër që ndalonte ish-presidentin Trump të shpërndante publikisht disa prova të dorëzuara nga prokurorët.

Zoti Trump u lejua të mos paraqitej personalisht në gjykatë për të shmangur sfidat e mëdha të sigurisë dhe logjistikës, që shoqëruan shpalljen e akuzës ndaj tij muajin e kaluar.

Ish-presidenti republikan mund të flasë publikisht për çështjen penale sipas urdhrit të gjykatësit Merchan, por ai mund të mbajë përgjegjësi për shpërfillje të gjykatës, nëse përdor provat e dhëna nga prokurorët kundër dëshmitarëve ose personave të tjerë të përfshirë në këtë çështje. Trump deklaroi se ishte i pafajshëm më 4 prill për 34 akuza lidhur me falsifikim të të dhënave të biznesit në lidhje me pagesat që kompania e tij i kishte dhënë ish-avokatit të tij, Michael Cohen.

LEXONI GJITHASHTU: 

• “Këtu do jemi, do flasim”, Nesturi-Balliut: E keni shansin për t’u ringritur, por…
• Martin Leka: Majlinda Bregu duhet të vendoset në krye të PD, zgjidhja e vetme